எதை பார்த்தாலும் கையில் எடுத்துகொள்வதை போல
இந்த பூனை குட்டியையும் தூக்கி கொண்டு வந்துவிட்டாள் மீனுக்குட்டி
யாரவது விருந்தினர் வந்தால் மிரண்டு பார்த்துவிடு
பின் அரை மணிக்குள் அவர்கள் மடியில் அமர்ந்துவிடுவது போல
சுவர் ஓரமாய் ஒதுங்கி சென்ற குட்டி பூனை மெது மெதுவாய்
கால் இடைவெளிக்குள் புகுந்து உரசி செல்கிறது..
எங்கயோ விளையாடி விட்டு ஓடிவந்து மடி மீது வந்து விழும் மீனுக்குட்டி
அந்த விளையாட்டை குட்டிபூனைக்கும் சொல்லிக்குடுத்து விட்டாள் போல
அனுமதிக்காமலே அதுவாகவே யார் மடியிலாவது தலை சாய்த்து விடுகிறது.
தட்டி கொடுத்து தலைகோதி விட்டு மீனுகுட்டியை உறங்கவைப்பதை பார்த்து. இப்போதேல்லாம்
குட்டிபூனையும் உடல்குறுக்கி அருகில் வந்து அமர்ந்துவிடுகிறது
அதன் பஞ்சு உடம்பில் தடவி குடுக்காமல் விடுவதாய் இல்லை ...
மீனுகுட்டி மிக ரகசியமாக குட்டி பூனையிடம் மழலை மொழியில் சொல்வதற்கு...
மியாவ் மொழியில் இது பதில் சொல்லிகொண்டிருக்கிறது...
அம்மா இல்லாத போது சாக்லேட் தேடிபிடித்து மறைந்து சாப்பிடும்
மீனுக்குட்டியும்
ஆட்கள் இல்லாத பொது பால்சட்டியை உருட்டி பால்குடிக்கும்
குட்டி பூனையும்
மாட்டிகொண்டாள் இருவரும் ஒன்றாக மருண்டு முழிக்கிறார்கள்.....
--------------பாரதிசரண்
